CREATIVIDADE X: EXPOSICIÓN INTERPLANETARIA

" É o tempo que perdiches con ela o que fai á túa rosa tan importante. 
 -É o tempo que perdín coa miña rosa...- repetiu o principiño para se acordar. 
-Os homes esqueceron esta verdade -dixo o raposo-, pero ti non a debes esquecer. Es responsable para sempre daquilo que domesticaches. Es responsable da túa rosa... 
-Son responsable da miña rosa... -repetiu o principiño para se acordar. "

Claude-Achille Debussy - Arabesque nº1





E chegou o gran día : 21 de maio, un día despois de que se produciran varios fenómenos asombrosos na galaxia : o eclipse anular, a aliñación do sol, da terra , da lúa e das pléiades e , xusto  ao día seguinte...


¡¡¡ Inauguración da Exposición Interplanetaria sobre O Principiño no IES Leliadoura de Ribeira!!!


E o máis marabilloso: ¡¡¡O Principiño "in person", con asteroide incorporado , non quixo perderse o evento, e participou, como un máis, na lectura multilingüe que se realizou esta mañá nas Sala de Usos Múltiples!!!

 A Sala converteuse nunha auténtica Torre de Babel .
Castelá, rumano, francés, inglés, chinés, árabe, galego,  latín e italiano foron as linguas nas que se leu "O Principiño".

Moitas grazas a todos e todas pola vosa participación.
Grazas tamén ao principiño Brais,  por desempeñar tan ben o seu papel.


 24 de maio : VISITA DOS PRINCIPIÑOS E PRINCESIÑAS

 

 Con esta exposición pretendemos renderlle unha homenaxe ao pequeno príncipe e ao seu mundo. El serviunos de inspiración para dar saída á creatividade e a imaxinación non só do alumnado do IES Leliadoura, senón a dos nenos e nenas das Escolas de Educación Infantil de Pobra do Caramiñal, e, como non, tamén do profesorado. Porque se trata dunha obra inspiradora, chea de fondas reflexións éticas e filosóficas e impregnada, de principio a fin,  dun profundo alento poético.  Só hai que soltarse un pouco para que o neno das estrelas nos abrace e encha o noso corazón de tenrura e fantasía , activando ese lado dereito do noso cerebro que tantas gañas ten de crear e imaxinar.

Nas entradas introdutorias  a este proxecto sobre educación e creatividade, prometía conclusións. Neste momento só hai unha : ¡Uf! ¡Que cansazo!, pero tamén ¡que satisfacción!.

De novo agardo que vos divirtades tanto como nós.

Esta mostra contén traballos moi diversos :

-  “O principiño ilustrado”, realizado polo alumnado de Educación Plástica e Visual do IES Leliadoura. Os 27 capítulos ilustrados polo alumnado de Pura Villar Martínez.

- Escenografía para curtas de animación sobre esta obra.

- O traballo titulado “Isto non é un sombreiro” , ilustracións inspiradas no primeiro capítulo da obra, realizado tamén polo alumnado de Educación Plástica e Visual.

- Escenografía e atrezzo de personaxes de “O Principiño”, elaborado por alumnos/as de 4º de Diversificación de Mónica Montero.

- Galería de planetas e estrelas, dos alumnos de Educación Infantil das EEIs Vilariño e Fernández Varela, coordinado por Alicia Souto Veciño e Mª Josefina Pacheco Etchevers.

- Exposición bibliográfica da obra en 20 linguas distintas, libros pertencentes a unha colección particular.

- Principiños realizados polo alumnado de 1º de ESO, coordinados por  Mercedes Fariña e Antonio Cora  .

Isto que ven a continuación é só unha pequena mostra.

Estades todos e todas invitados á Exposición Interplanetaria do IES Leliadoura, que estará aberta ao público do 21 de maio ao 8 de xuño de 2012 .

O Principiño ilustrado

Escenografías para curtas de animación sobre "O Principiño"

Montaxe "Isto non é un sombreiro", alumnado de Educación Plástica e Visual.

Asteroide B612. Escenegrafía e atrezzo realizado polo  alumnado de 4º de Diversificación.
 Teño razóns ben serias para crer que o planeta de onde viña o principiño é o asteroide B 612. este asteroide non foi visto máis que unha vez, con axuda do telescopio, por un astrónomo turco, no ano 1909.

O faroleiro. Escenografía e atrezzo realizado polo alumnado de 4º de Diversificación.

Este —ía dicindo para si o principiño mentes seguía máis lonxe a súa viaxe —, este sería desprezado por todos os demais, polo rei, polo vaidoso, polo bebedor, polo home de negocios. Nembargantes, el é o único que non me parece ridículo. Quizais porque se preocupa doutra cousa que de si mesmo".

O Bebedor. Escenografía e atrezzo elaborado por alumnado de 4º de Diversificación

O planeta seguinte estaba habitado por un bebedor. Esta visita foi moi curta, pero sumiu ó principiño nunha gran melancolía.

—¿Que fas aí? —preguntoulle ó bebedor, que estaba sentado en silencio dediante dunha colección de botellas baleiras e outra coleccion de botellas cheas.

—¡Bebo! —respondeu o bebedor con ton lúgubre.

—¿Por que bebes? —preguntou o principiño.

—Para esquecer.

—¿Para esquecer que —inquiriu o principiño, xa compadecido.

—Para esquecer que sinto vergonza —confesou o bebedor baixando a cabeza.

—¿Vergonza de que? —preguntou o principiño, que quería socorrelo.

—¡Vergonza de beber! —dixo o bebedor, que se pechou definitivamente no silencio.

O vaidoso. Escenografía e atrezzo. 4º de Diversificación

O segundo planeta estaba habitado por un vaidoso.

—¡Ah! ¡Ah!, vénme visitar un admirador —berrou dende lonxe o vaidoso cando viu o principiño.

Porque para os vaidosos todos os demais homes son admiradores.

O rei. Escenografía e atrezzo. 4º de Diversificación.

O primeiro estaba habitado por un rei. O rei, vestido de púrpura e de armiño, estaba sentado nun trono moi simple, pero maxestoso.

—¡Ah! —exclamou o rei ó divisar o principiño —. Aquí temos un súbdito.

E o principiño preguntouse:

—¿Como me pode recoñecer se non me viu endexamais?

Non sabía que para os reis o mundo está moi simplificado. Todos os homes son súbditos.

O home de negocios. Escenografía e atrezzo. 4º de Diversificación.  Estrelas da nosa estrela Marusela.

—Se eu teño un pano de seda, podo levalo arredor do pescozo. Se teño unha flor, podo collela e levala. ¡Pero ti non podes coller as estrelas!

—Non, pero podo metelas nun banco.

—¿Qué quere dicir iso?

—Quere dicir que escribo nun papel o número de estrelas que teño e logo péchoo con chave nun caixón.

—¿E iso é todo?

—Abonda.

O xeógrafo. Escenografía e atrezzo. 4º de DiversificaciónVersion

—Si, claro —dixo o xeógrafo—, pero non son explorador. E non teño exploradores. E o xeógrafo non vai andar contando as cidades, os ríos, as montañas, os mares, os océanos e os desertos. O xeógrafo é demasiado importante para andar dun sitio para outro. Non sae do despacho, pero recibe os exploradores. Pregúntalles e toma nota dos seus recordos. E se os recordos dun deles lle parecen interesantes, o xeógrafo manda facer un inquérito sobre a moralidade do explorador.

Planetas realizados por alumnado de Educación Infantil do Fernández Varela de PObra do Caramiñal

Planetas realizados por alumnado da EEI Vilariño de PObra do Caramiñal

Mostra bibliográfica de "O Principiño" en 20 linguas diferentes

A serpe. Realizada por Alba de 1º de ESO
 

—Es un bicho raro— díxolle ó cabo—, tan delgado como un dedo

—Pero son máis poderosa có dedo dun rei —contestou a serpe.

O principiño sorriu:

—Ti non es poderosa… Non tes patas… nin podes viaxar…

—Eu pódote levar máis lonxe que un navío —dixo a serpe. Enroscouse arredor do nocello do principiño, como unha abrazadeira de ouro.

—Ó que lle toco, fágoo volver á terra de onde saíu. Pero ti es puro e vés dunha estrela…

O principiño non respondeu.

—Dásme pena, ti, tan débil sobre esta terra de granito. Pódote axudar se un día botas moito de menos o teu planeta. Podo…

—¡Oh! Xa te comprendín —dixo o principiño—, pero ¿por que falas sempre por medio de enigmas?—Eu resólvoos todos —dixo a serpe.

E calaron.

Algúns dos principiños creados por alumnos e alumnas de 1º de ESO. En canto teña tempo, volos mostrarei nunha presentación (thanks, Tista).

galería principiños (thanks, Tista)